THE PUBLIC POST
کراچی بندرگاہ پر پرانے کنٹینرز کے خاتمے کے لیے 30 روز کی مہلت دے دی گئی۔
وفاقی وزیرِ بحری امور جنید انوار چوہدری کی زیرِ صدارت کراچی بندرگاہ پر پھنسے پرانے کنٹینرز سے متعلق اہم اجلاس منعقد ہوا۔
اجلاس میں وزیرِ بحری امور نے پرانے اور غیر استعمال شدہ کنٹینرز کو ہٹانے کے لیے 30 روز کی مہلت دے دی۔
انہوں نے کہا کہ علاقائی صورتِ حال کے پیشِ نظر بندرگاہوں پر ٹرانس شپمنٹ کارگو میں نمایاں اضافہ ہوا ہے، جس کے باعث رش بڑھ رہا ہے۔
وزیرِ بحری امور نے بندرگاہوں پر دباؤ کم کرنے کے لیے جامع حکمت عملی کو ناگزیر قرار دیتے ہوئے کراچی پورٹ ٹرسٹ اور ٹرمینل آپریٹرز سے فوری طور پر شفٹنگ پلان طلب کر لیا۔
انہوں نے ہدایت کی کہ آف ڈاک ٹرمینلز پر کارگو کی منتقلی کے لیے واضح کمرشل میکنزم ترتیب دیا جائے، جبکہ آف ڈاک سہولتوں اور ٹرانس شپمنٹ کارگو کا مکمل ریکارڈ بھی رکھا جائے۔
اجلاس میں اضافی سامان، لکڑی کے پیلیٹس اور غیر استعمال شدہ آلات کو جلد از جلد ہٹانے کی بھی ہدایت دی گئی۔
وزیر بحری امور کا کہنا ہے کہ ان اقدامات سے بندرگاہوں پر رش میں کمی آئے گی، تجارت میں آسانی ہو گی اور ملک کا لاجسٹکس نظام مزید بہتر ہو گا۔
