THE PUBLIC POST
ملک کے مختلف شہروں میں موسم کی خراب صورتحال کے باعث فلائٹ آپریشن بری طرح متاثر ہوا ہے۔ کراچی ایئرپورٹ سے جانے والی ملکی و غیرملکی 12 پروازیں منسوخ کر دی گئیں۔
قومی ایئرلائن کی کراچی سے اسلام آباد کی پرواز پی کے 300 آدھا گھنٹہ تاخیر سے روانہ ہوئی، جبکہ نجی ایئرلائن کی کراچی سے پشاور کی پرواز اپنے شیڈول کے مطابق دو بج کر 45 منٹ پر روانہ ہونا تھی۔
دوسری جانب سیالکوٹ ایئرپورٹ پر شدید دھند کے باعث دبئی اور مسقط سے آنے والی پروازیں دو گھنٹے تاخیر سے دوپہر ایک بجے لینڈ ہوئیں۔ ملتان ایئرپورٹ سے روانہ ہونے والی ملکی و غیرملکی پروازیں بھی کئی گھنٹوں کی تاخیر کا شکار رہیں۔ علاوہ ازیں نجی ایئرلائن کی اسلام آباد سے کراچی کی پرواز دو گھنٹے تاخیر سے صبح گیارہ بجے روانہ ہوئی۔
ایئرپورٹ انتظامیہ کے مطابق موسم بہتر ہونے پر فلائٹ آپریشن بحال کر دیا جائے گا، جبکہ مسافروں کو ہدایت کی گئی ہے کہ روانگی سے قبل اپنی پرواز کے بارے میں ایئرلائن سے تصدیق ضرور کریں۔
