کراچی: خاتون سے زیادتی، جرم ثابت ہونے پر ملزم کو 10سال کی سزا

ایڈیشنل ڈسٹرکٹ اینڈ سیشن عدالت جنوبی نے کراچی علاقے بوٹ بیسن میں خاتون سے زیادتی کے کیس میں جرم ثابت ہونے پر ملزم کو 10 سال قید کی سزا سنا دی۔

عدالت نے حکم دیا ہے کہ ملزم متاثرہ خاتون کو 2 لاکھ روپے ہرجانہ بھی ادا کرے۔

عدالت نے اپنے فیصلے میں کہا ہے کہ ملزم نے اپنے دعوے سے متعلق کوئی شواہد پیش نہیں کیے۔

ایڈیشنل ڈسٹرکٹ اینڈ سیشن عدالت نے کہا کہ جنسی جرائم کے مقدمات کے اندراج میں تاخیر از خود مقدمے کو ختم نہیں کرتی۔

جج کا کہنا ہے کہ ملزم کے خلاف متاثرہ خاتون کا بیان اور شواہد کا تسلسل موجود ہے۔