کراچی: کورنگی میں 3 لاکھ کی سپاری دے کر باپ کو قتل کروانے والا بیٹا گرفتار

کراچی(پبلک پوسٹ)کراچی کے علاقے کورنگی میں 3 لاکھ روپے کی سپاری دے کر والد کو قتل کروانے والے بیٹے اور ساتھی ملزمان کو گرفتار کرلیا گیا۔

اطلاعات کے مطابق پولیس حکام نے بتایا کہ افسوس ناک واقعہ زمان ٹاون تھانے کی حدود میں 18 فروری 2025 کو پیش آیا تھا، جب سید محمد متین خان نامی شخص کو گھر کے قریب فائرنگ کر کے قتل کردیا گیا تھا۔

پولیس نے واقعے میں ملوث مقتول کے بیٹے دانش، اس کی بیوی طوبیٰ، دانش کی دوست ایمن اور 2 ملزمان محمد ظریف اور شہید اللہ کو گرفتار کر کے ان کے قبضے سے نائن ایم ایم پستول اور تھانہ کورنگی صنعتی ایریا کی حدود سے چھینی گئی موٹر سائیکل برآمد کر لی، تاہم مرکزی ملزم سیال خان کی گرفتاری کے لیے کوشش کی جارہی ہے۔

پولیس نے بتایا کہ مقتول متین کیبل کا کام کرتا تھا اور ملزم دانش اپنے والد کے ساتھ کام کرتا تھا، ملزم دانش کی ایمن نامی خاتون کے ساتھ دوستی ہو گئی جس کے بعد وہ پیسوں میں ہیر پھیر کرنے لگا تھا۔

ملزم کے والد کو پتا چلا تو انہوں نے 8 ماہ قبل ملزم دانش کو کام سے الگ کر دیا اور گھر سے نکال دیا جس کے بعد ملزم اپنے سسرال میں جا کر رہنے لگ گیا۔

پولیس کے مطابق سسرال والوں نے اس کے والد کو سمجھایا تو وہ واپس گھر آگیا اور کلفٹن میں ملازمت کرنے لگا جہاں اس کی ملاقات سیال خان نامی سیکیورٹی گارڈ سے ہوئی، سیال خان نے نوکری چھوڑ دی تاہم ملزم دانش اس سے رابطے میں رہا اور اس کے ساتھ مل کر وارداتیں بھی کرنے لگا۔

2 ماہ قبل ملزم کا اپنے باپ سے پھر جھگڑا ہوگیا جس پر اس کے باپ نے اسے برا بھلا کہا تو ملزم نے سیال خان سے باپ کو قتل کرنے کی بات کی اور 3 لاکھ روپے میں سپاری دے کر والد کو قتل کروا دیا۔