ایٹمی دھماکے کرنے کا فیصلہ صرف اورصرف نوازشریف کا تھا: مشاہد حسین

1998 میں پاکستان کے ایٹمی دھماکوں کے وقت وفاقی وزیر اطلاعات کا عہدہ رکھنے والے مشاہد حسین کا کہنا ہے کہ ایٹمی دھماکوں کا فیصلہ صرف اور صرف نواز شریف حکومت کا تھا اور اس وقت کی اسٹیبلشمنٹ اور سروس چیفس کا کوئی پریشر نہیں تھا۔

وی نیوز ایکسکلوسیو میں گفتگو کرتے ہوئے سابق وفاقی وزیر نے بتایا کہ انہوں نے بھی نواز شریف کو دھماکوں کا مشورہ دیا تھا جس کی تصدیق خود سابق وزیراعظم نے بھی کی تھی۔

’1998 میں پاکستان نے 5 انڈین ایٹمی دھماکوں کے مقابلے میں 6 ایٹمی دھماکے کرکے دھاک بٹھا دی، 1998 ہو یا آج، پاکستانی قوم نے تمام تر اختلافات بھول کر اتحاد و اتفاق کا مظاہرہ کیا، پاکستانی قوم دلیر ہے۔‘

انہوں نے کہاکہ پاکستان انڈیا کشیدگی میں دنیا پاکستان کے مؤقف کی تائید کررہی ہے، کیوں کہ پاکستان حق پر کھڑا ہے۔ اس وقت دنیا کی 3 بڑی طاقتیں امریکا، چین اور روس پاکستان کے ساتھ ہیں۔

‘مشاہد حسین سید کے مطابق انڈیا کے مقابلے میں پاکستان کی ہمت، صلاحیت اور اسٹریٹجی بہت شاندار ہے۔ ’پاکستان انڈیا جنگ ہوتی نظر نہیں آ رہی، تاہم اگر جنگ ہوئی تو افواج پاکستان سمیت حکومت اور قوم مکمل تیار ہیں۔