ترک انفلوئنسر کی خودکشی، مشہور شخصیاتکی ذہنی صحت پر سوالات اٹھنے لگے

ترکی کی معروف سوشل میڈیا انفلوئنسر Kubra Karaaslan کے افسوسناک انتقال نے سوشل میڈیا صارفین کو گہرے صدمے میں مبتلا کر دیا ہے۔

رپورٹس کے مطابق 21 سالہ کبریٰ کارااصلان نے Osman Gazi Bridge سے چھلانگ لگا دی۔ عینی شاہدین کے مطابق وہ دن کے وقت پل کی حفاظتی ریلنگ پر چڑھ گئیں، جس پر وہاں موجود افراد اور ڈرائیورز نے فوری طور پر انہیں روکنے کی کوشش کی، تاہم وہ اس اقدام سے باز نہ آئیں۔

واقعے کے بعد ریسکیو ٹیمیں فوری طور پر موقع پر پہنچیں اور انہیں پانی سے نکال کر قریبی اسپتال منتقل کیا گیا، لیکن وہ جانبر نہ ہو سکیں اور ڈاکٹروں نے ان کے انتقال کی تصدیق کر دی۔

کبریٰ کارااصلان سوشل میڈیا پر لائف اسٹائل مواد کے باعث خاصی مقبول تھیں اور ان کے ہزاروں مداح موجود تھے۔ ان کی اچانک موت کے بعد مداحوں اور صارفین کی جانب سے شدید دکھ اور افسوس کا اظہار کیا جا رہا ہے۔

اس واقعے کے بعد سوشل میڈیا پر ذہنی صحت کے حوالے سے ایک اہم بحث بھی چھڑ گئی ہے، جس میں یہ سوال اٹھایا جا رہا ہے کہ آخر کیوں بعض مشہور شخصیات شدید دباؤ، تنہائی یا دیگر مسائل کے باعث ایسے انتہائی اقدامات کی طرف مائل ہو جاتی ہیں۔

اگر آپ یا آپ کے آس پاس کوئی فرد ذہنی دباؤ یا مایوسی کا شکار ہو، تو اس بارے میں بات کرنا اور پیشہ ورانہ مدد حاصل کرنا نہایت ضروری ہے۔ مدد لینا کمزوری نہیں بلکہ ایک اہم اور مثبت قدم ہے۔