THE PUBLIC POST
ملک میں اربوں روپے کی اوور انوائسنگ کے ذریعے منی لانڈرنگ اور مالی بے ضابطگیوں کے انکشاف کے بعد وزیراعظم میاں شہباز شریف نے ذمہ داروں کا تعین کرتے ہوئے ملوث عناصر کے خلاف سخت قانونی کارروائی کی ہدایت جاری کر دی ہے۔
تفصیلات کے مطابق فیڈرل بورڈ آف ریونیو (ایف بی آر) کی کارکردگی اور متعلقہ امور کا جائزہ لینے کے لیے وزیراعظم کی زیر صدارت ایک اہم اجلاس منعقد ہوا، جس میں اوور انوائسنگ سے متعلق قائم کردہ کمیٹی کی رپورٹ پیش کی گئی۔
ذرائع کے مطابق وزیراعظم نے ہدایت کی کہ ملوث افراد کے خلاف فوری اور مؤثر قانونی کارروائی کو یقینی بنایا جائے۔
اجلاس سے خطاب کرتے ہوئے وزیراعظم نے کہا کہ 2017 سے 2022 کے دوران اوور انوائسنگ کا غیر قانونی سلسلہ جاری رہا جبکہ متعلقہ ادارے اپنی ذمہ داریاں ادا کرنے میں ناکام رہے۔
انہوں نے مزید ہدایت کی کہ اس معاملے میں ملوث تمام افراد کے خلاف کارروائی تیز کی جائے اور غفلت برتنے والے اہلکاروں کے خلاف بھی محکمانہ اقدامات کیے جائیں۔
وزیراعظم کا کہنا تھا کہ ٹیکس سے حاصل ہونے والی رقم قومی امانت ہے اور اس کے شفاف استعمال کو یقینی بنانا ریاست کی بنیادی ذمہ داری ہے۔
انہوں نے مستقبل میں اس نوعیت کے واقعات کی روک تھام کے لیے جامع حکمت عملی تیار کرنے، فنانشل مانیٹرنگ یونٹ کو مزید فعال بنانے اور اس میں ایف آئی اے اور انٹیلیجنس بیورو کے نمائندوں کو شامل کرنے کی بھی ہدایت کی۔
اجلاس میں بریفنگ دیتے ہوئے بتایا گیا کہ ایف بی آر نے سنٹرلائزڈ پرائس ویریفکیشن پورٹل تیار کر لیا ہے، جو جون کے اختتام تک بینکوں کے ساتھ منسلک کر دیا جائے گا۔ مزید یہ کہ اکتوبر 2022 میں پوسٹ کلیئرنگ آڈٹ ونگ نے اوور انوائسنگ کی نشاندہی کی تھی، جس کے بعد اب تک 13 مقدمات درج کیے جا چکے ہیں اور قانونی کارروائی جاری ہے۔
