تین دن میں پیٹرول پر 21 روپے کا اضافہ، لاہور میں رات گئے رکشہ ڈرائیور سڑکوں پر نکل آئے

لاہور: پٹرولیم مصنوعات کی قیمتوں میں حالیہ اضافے کے خلاف مرکزی مسلم لیگ کے زیر اہتمام رات گئے یتیم خانہ چوک پر احتجاج کیا گیا جس میں رکشہ، بس اور موٹر سائیکل ڈرائیوروں نے شرکت کی۔

مظاہرین نے پٹرول کی بڑھتی قیمتوں کے خلاف شدید نعرے بازی کرتے ہوئے حکومت سے قیمتوں میں فوری کمی کا مطالبہ کیا۔ ان کا کہنا تھا کہ صرف 3 روز میں پٹرول 21 روپے مہنگا ہونا غریب عوام پر ظلم ہے۔

احتجاجی شرکا کے مطابق مہنگے پٹرول کے باعث رکشہ ڈرائیوروں کا روزگار شدید متاثر ہورہا ہے جبکہ پہلے ہی مہنگائی تلے دبے عوام کے لیے دو وقت کی روٹی کا حصول مشکل ہوگیا ہے۔

ملی رکشہ یونین نے مطالبہ کیا کہ پٹرولیم مصنوعات کی قیمتیں فوری واپس کم کی جائیں۔ یونین رہنماؤں نے خبردار کیا کہ مطالبات تسلیم نہ کیے گئے تو احتجاج کا دائرہ مزید وسیع کیا جائے گا۔

مظاہرین کا کہنا تھا کہ حکومتی فیصلوں کا بوجھ عام عوام کے بجائے اشرافیہ کو اٹھانا چاہیے۔