وزیراعلیٰ پنجاب کا رائے ونڈ اجتماع کیلیے تین دن الیکٹرو بس چلانے کا اعلان

ﻻپنجاب (پبلک پوسٹ)وزیراعلی پنجاب مریم نواز شریف نے رائے ونڈ اجتماع کے لیے تین دن الیکٹرو بس چلانے کا اعلان کر دیا جبکہ رائے ونڈ جانے والے راستوں پر فوری پیچ ورک کا حکم بھی دے دیا۔

ریلوے اسٹیشن اور ایئرپورٹ سے الیکٹرو بس رائے ونڈ تک چلائی جائی گی۔

وزیراعلیٰ پنجاب مریم نواز شریف سے مرکز تبلیغی جماعت کے شوریٰ ارکان کی ملاقات ہوئی۔ ڈاکٹر ندیم اشرف، مولانا امجد فاروق، مولانا محمد امیر، امتیاز احمد غنی اور ارشد ملاقات کرنے والوں میں شامل تھے۔

مریم نواز شریف کی جانب سے رائیونڈ اجتماع کے لیے تمام ممکنہ سہولتیں فراہم کرنے اور بہترین انتظامات کی ہدایت کی گئی۔ وزیراعلیٰ مریم نواز شریف نے ڈی سی، سی سی پی او، ڈی آئی جی اور سی ٹی او کو خود رائیونڈ جانے کی ہدایت کی۔

تبلیغی جماعت کے وفد کی جانب سے وزیراعلیٰ مریم نواز شریف کے عوامی خدمات کی تحسین اور کامیابی کے لئے خصوصی دعائیں کی گئیں۔

وزیراعلیٰ مریم نواز شریف نے رائے ونڈ کی تین روڈز کی فوری تعمیر و مرمت اور یکم نومبر سے اجتماع کے ختم ہونے تک خصوصی صفائی مہم کی ہدایت کر دی۔ انہوں نے رائے ونڈ میں اسپیشل صفائی اور عرق گلاب کے چھڑکاؤ کا حکم دیا۔

تبلیغی جماعت کے اکابرین نے الیکٹرو بس پراجیکٹ کے اجرا اور چند ماہ میں 90 ہزار گھر بنانے پر خراج تحسین پیش کیا۔ تبلیغی جماعت کے اکابرین نے شہروں کے ساتھ ساتھ دیہات میں صفائی کو بھی سراہا۔

اکابرین تبلیغی جماعت نے کہا کہ سیلاب متاثرین کی مدد کے لیے ہاتھ نہ پھیلانا قابل تحسین عمل ہے، کوئی چھوٹے شہر میں گرین بس جیسی سروس کا سوچ نہیں سکتا تھا۔ عوام کا تاثر بدل رہا ہے، پہلے انگلینڈ جاتے تھے کوئی بات نہیں سنتا تھا، اب عزت کرتے ہیں۔

اکابرین تبلیغی جماعت کا کہنا تھا کہ مریم نواز شریف بہت خدمت کر رہی ہیں شہروں کو ایسا صاف کبھی نہیں دیکھا۔ تبلیغی اجتماع میں 110 ممالک سے لوگ شریک ہوتے ہیں، سب نے الیکٹرو بس کی تعریف کی۔ عوامی خدمت کی جو مثال وزیراعلیٰ مریم نواز شریف نے پنجاب میں قائم کی و قابل تعریف اور قابل تقلید ہیں۔

مریم نواز کا کہنا تھا کہ نواز شریف صاحب نے فوری طور پر تبلیغی جماعت اکابرین سے ملاقات کا کہا، مخلوق خدا کی خدمت اور خالق کائنات کی عبادت کے جذبے سے کرتی ہوں۔ دعا ہے اللہ تعالیٰ عوام کی خدمت کی توفیق دے۔

انہوں نے کہا کہ مخالفین کی باتوں پر صبر کرتی ہوں لیکن بعض اوقات عوام کے لیے بولنا ضروری ہوتا ہے، صدق دل سے رضائے الٰہی کے لیے عوام کی خدمت کرنا چاہتے ہیں۔ خدمت کا جذبہ سچا ہے اللہ تعالیٰ غیب سے وسائل مہیا کرے گا۔

وزیراعلیٰ مریم نواز شریف نے مرکز رائیونڈ کی دینی خدمات کو خراج تحسین پیش کیا۔ وزیراعلیٰ مریم نواز شریف نے وفد سے ملک و قوم کی سلامتی، امن وامان اور سیلاب زدگان کیلئے خصوصی دعا کی درخواست بھی کی۔