ڈونلڈ ٹرمپ کل رات سوئے نہیں،ہر گھنٹے بعد سوشل میڈیا پوسٹس شیئر کرتے رہے

امریکی صدر ڈونلڈ ٹرمپ مبینہ طور پر گزشتہ رات تقریباً جاگتے رہے اور سوشل میڈیا پر مسلسل سرگرم رہے، جہاں انہوں نے رات 9 بجے سے صبح 4 بجے تک وقفے وقفے سے متعدد پوسٹس شیئر کیں۔ رپورٹ کے مطابق وہ اوسطاً ہر گھنٹے میں مختلف نوعیت کی پوسٹس جاری کرتے رہے۔

ابتدائی پوسٹ میں رات 9 بجے انہوں نے پوپ لیو کو خارجہ پالیسی کے حوالے سے تنقید کا نشانہ بناتے ہوئے انہیں ’’نقصان دہ‘‘ قرار دیا۔ اس کے تقریباً ایک گھنٹے بعد انہوں نے مصنوعی ذہانت (AI) کے ذریعے تیار کردہ اپنی ایک تصویر شیئر کی، جس میں انہیں ’’حضرت عیسیٰ علیہ السلام‘‘ سے مشابہ انداز میں دکھایا گیا تھا۔ اس پوسٹ پر امریکا میں شدید تنقید سامنے آئی ہے۔

بعد ازاں انہوں نے بغیر کسی وضاحت کے ایک تصویر شیئر کی جس میں چاند پر ’’ٹرمپ ٹاور‘‘ دکھایا گیا تھا۔ رات تقریباً ساڑھے بارہ بجے انہوں نے ایک بیان میں کہا کہ امریکی فوج ایران میں باقی ماندہ اہداف کو نشانہ بنائے گی اور آبنائے ہرمز پر ناکہ بندی کی جائے گی۔

رات ڈھائی بجے کے قریب انہوں نے سابق صدر جو بائیڈن اور ان کے بیٹے ہنٹر بائیڈن سے متعلق ایک مضمون شیئر کیا، جسے کچھ دیر بعد دوبارہ پوسٹ بھی کیا گیا۔ اس کے علاوہ انہوں نے ایک بال روم سے متعلق پوسٹ بھی شیئر کی۔

صبح 4 بج کر 10 منٹ کے قریب انہوں نے آبنائے ہرمز سے متعلق ایک خبر دوبارہ شیئر کی جس میں ناکہ بندی کے حوالے سے بات کی گئی تھی۔

رپورٹ کے مطابق ان پوسٹس کے علاوہ بھی ٹرمپ نے رات بھر مختلف مضامین اور بیانات شیئر کیے، جس سے ان کی سوشل میڈیا پر غیر معمولی سرگرمی ظاہر ہوتی ہے۔