THE PUBLIC POST
کمیٹی تمام پہلوؤں کا جائزہ لے کر پیر کو حتمی رپورٹ انتظامیہ کو پیش کرے گی
کراچی میں جناح اسپتال کے واش روم میں بچے کی مبینہ پیدائش کے واقعے کی تحقیقات کے لیے 5 رکنی اعلیٰ سطحی کمیٹی تشکیل دے دی گئی ہے۔ اسپتال انتظامیہ نے واقعے کی مکمل چھان بین اور حقائق سامنے لانے کے لیے باقاعدہ نوٹیفکیشن جاری کر دیا۔
نوٹیفکیشن کے مطابق تحقیقاتی کمیٹی میں دو پروفیسرز، ایک ایگزیکٹو ڈائریکٹر، ایک جوائنٹ ڈائریکٹر اور ایک اسسٹنٹ ڈائریکٹر کو شامل کیا گیا ہے۔ کمیٹی کی سربراہی پروفیسر حلیمہ یاسمین کریں گی، جنہیں چیئرپرسن مقرر کیا گیا ہے۔
کمیٹی کے دیگر ارکان میں پروفیسر عبدالرب بھٹو اور ڈاکٹر صدام صالح شامل ہیں، جو واقعے کے مختلف پہلوؤں کا تفصیلی جائزہ لیں گے۔ کمیٹی کو ہدایت کی گئی ہے کہ وہ تمام متعلقہ شواہد، طبی ریکارڈ اور ذمہ داریوں کا تعین کرکے اپنی رپورٹ مرتب کرے۔
جناح اسپتال کے ترجمان ڈاکٹر وقاص کے مطابق تحقیقاتی کمیٹی واقعے کے تمام پہلوؤں کا غیر جانبدارانہ جائزہ لے گی اور آئندہ ہفتے پیر کے روز اپنی حتمی رپورٹ اسپتال انتظامیہ کو پیش کرے گی، جس کی روشنی میں مزید کارروائی کا فیصلہ کیا جائے گا۔
یہ واقعہ اس وقت زیر بحث آیا جب سوشل میڈیا پر ایک ویڈیو وائرل ہوئی جس میں متاثرہ خاتون کے اہل خانہ نے الزام عائد کیا تھا کہ بروقت طبی امداد نہ ملنے کے باعث خاتون نے اسپتال کے واش روم میں بچے کو جنم دیا۔
