اداکارہ زینب رضا کے لباس پر سوشل میڈیا صارفین کی تنقید

لاہور: اداکارہ اور ماڈل زینب رضا کو ایک ڈرامے میں پہنے گئے لباس کے باعث سوشل میڈیا پر تنقید کا سامنا کرنا پڑرہا ہے۔
تفصیلات کے مطابق زینب رضا کے ڈرامے میں جہاں ان کی اداکاری کو ناظرین کی جانب سے سراہا جا رہا ہے، وہیں ان کے ملبوسات نے بھی توجہ حاصل کر لی ہے۔

ڈرامے کے ایک منظر میں اداکارہ جامنی رنگ کی ساڑھی میں نظر آئیں، جس کے ساتھ پہنا گیا بلاؤز بعض ناظرین کے نزدیک غیر معمولی طور پر بولڈ تھا، اگرچہ منظر کو ایڈیٹنگ کے ذریعے محدود انداز میں پیش کیا گیا، تاہم لباس کے انتخاب نے سوشل میڈیا پر بحث چھیڑ دی۔

واقعے کے بعد متعدد صارفین نے ڈراموں میں ملبوسات کے انتخاب پر سوالات اٹھائے، بعض افراد کا کہنا تھا کہ قومی سطح پر نشر ہونے والے ڈراموں میں لباس کے حوالے سے زیادہ احتیاط برتی جانی چاہیے، جبکہ کچھ صارفین نے ہدایت کار اور پروڈکشن ٹیم کے فیصلوں کو بھی تنقید کا نشانہ بنایا۔

دوسری جانب کچھ مداحوں نے مؤقف اختیار کیا کہ فنکاروں کے ملبوسات کو غیر ضروری تنازع کا موضوع بنانے کے بجائے ان کی اداکاری اور کردار پر توجہ دی جانی چاہیے۔

سوشل میڈیا پر جاری اس بحث نے ایک بار پھر پاکستانی ڈراموں میں ملبوسات، ثقافتی اقدار اور تخلیقی آزادی کے درمیان توازن کے موضوع کو زیرِ بحث لا دیا ہے۔