ملک میں سب سے زیادہ بلیو پاسپورٹس بیورو کریٹس کے ہیں، وزیر مملکت داخلہ

اسلام آباد: وزیر مملکت برائے داخلہ طلال چوہدری نے کہا ہے کہ ملک میں سب سے زیادہ بلیو پاسپورٹس بیورو کریٹس کے ہیں۔

سینیٹ کی قائمہ کمیٹی برائے داخلہ کے اجلاس میں سینیٹر عابد شیر علی نے بتایا کہ میری فیملی کے پاسپورٹ بنانے کے لیے مجھ سے این او سی مانگاگیا۔ میں پاسپورٹ آفس خود گیا، لیکن عملے کی جانب سے کہا گیا کہ این او سی لازمی ہے۔ عملے نے کہا کہ وزارت کی طرف سے کہا گیا ہے کہ این او سی ضروری ہے۔

ڈی جی پاسپورٹ محمد علی رندھاوا نے اس موقع پر بتایا کہ ارکان پارلیمنٹ کی فیملی کا ڈیٹا وزارت داخلہ کو بھجواتے ہیں۔

وزیر مملکت برائے داخلہ طلال چوہدری نے کہا کہ جب بھی ہم ویزا فری کرنے کی بات کرتے ہیں، دوسرے ممالک کے حکام ہم سے بلیو پاسپورٹس کی تعداد پوچھتے ہیں۔ ہم ان کو 75 ہزار بتاتے ہیں۔

انہوں نے کہا کہ 30 ہزار بلیو پاسپورٹ ہم نے کم کیے ہیں۔ ان میں سب سے زیادہ بلیو پاسپورٹس بیورو کریٹس کے ہیں۔