THE PUBLIC POST
بھارتی ریاست مدھیہ پردیش سے تعلق رکھنے والی 30 سالہ سوشل میڈیا انفلوئنسر نِدھی تیواری کی پراسرار موت نے ان کے چاہنے والوں کو صدمے میں مبتلا کردیا۔
بھارتی میڈیا کے مطابق نِدھی کے فیس بک پر تقریباً 9 لاکھ اور انسٹاگرام پر 7 لاکھ فالوورز تھے، نِدھی کی ویڈیوز کو لاکھوں افراد دیکھتے تھے اور ان کا شمار نمایاں سوشل میڈیا شخصیات میں ہوتا تھا۔
نِدھی نے 2024 میں ’مس پریٹی انڈیا‘ کا اعزاز حاصل کیا تھا اور ماڈلنگ و اداکاری میں کیرئیر بنانے کی کوشش کر رہی تھیں، وہ ماڈلنگ اور ڈیجیٹل کانٹینٹ کرئیٹنگ کی سرگرمیوں میں بھی متحرک تھیں۔
بھارتی میڈیا کے مطابق گزشتہ ہفتے نِدھی کے گھر والوں کو ان کی پھندا لگی لاش ملی، اہلخانہ نِدھی کو اسپتال لے گئے جہاں ڈاکٹروں نے ان کی موت کی تصدیق کردی۔
نِدھی کے اہلخانہ کے مطابق واقعے سے قبل ان کی بیٹی کسی شخص سے فون پر بات چیت کررہی تھی اور پریشان دکھائی دے رہی تھی۔
پولیس نے میڈیا کو بتایا کہ نِدھی کی موت سے قبل ہونے والی گفتگو اور دیگر حالات کی تحقیقات جاری ہیں، واقعہ خودکشی کا ہے یا قتل کا اس حوالے سے تحقیقات کی جارہی ہیں۔
