THE PUBLIC POST
اسلام آباد کی انسداد دہشت گردی کی عدالت میں پی ٹی آئی کارکنان اور رہنماؤں کے خلاف 5 اکتوبر کے احتجاج کے 3 مقدمات میں پراسیکوشن نے چالان پیش کر دیا۔
انسداد دہشت گردی کی عدالت کے جج طاہر عباس سِپرا نے کیسز پر سماعت کی۔ عدالت نے غیر حاضر ملزمان کو ایک بار پھر طلبی کے نوٹس جاری کر دیے۔
دورانِ سماعت اعظم سواتی سمیت مجموعی طور پر 31 ملزمان کی حد تک چالان پیش کیا گیا۔
عدالتی حکم کے باوجود بانی پی ٹی آئی سے ملاقات نہ کرانے پر جیل حکام سے جواب طلب
جج طاہر عباس سِپرا نے کہا کہ تفتیشی افسر سے پوچھوں گا کہ بانی پی ٹی آئی سمیت دیگر ملزمان کا چالان کیوں نہیں آیا؟ ابھی وارنٹ جاری نہیں کر رہا بس نوٹس کر رہا ہوں، اعظم سواتی کو کہیں وہ آج آکر اپنی حاضری لگوائیں۔
عدالت نے تھانہ بارہ کہو کے مقدمے کی سماعت 13 جون تک ملتوی کر دی۔
واضح رہے کہ پی ٹی آئی رہنماؤں اور کارکنان کے خلاف تھانہ آبپارہ، سنگجانی اور دیگر میں مقدمات درج ہیں، جن میں بانی پی ٹی آئی، عمر ایوب، سمیت دیگر پی ٹی آئی قیادت بھی مقدمات میں نامزد ہے۔
