THE PUBLIC POST
کراچی میں شدید گرمی کے دوران غیر اعلانیہ اور طویل لوڈشیڈنگ نے شہریوں کی مشکلات میں اضافہ کر دیا ہے۔ شہر کے مختلف علاقوں میں کئی کئی گھنٹے بجلی کی بندش کے باعث معمولاتِ زندگی بری طرح متاثر ہو رہے ہیں۔
میڈیا رپورٹس کے مطابق وہ علاقے بھی لوڈشیڈنگ کی زد میں آ گئے ہیں جنہیں ماضی میں مستثنیٰ قرار دیا گیا تھا۔ کیماڑی، کھارادر، لیاری، اورنگی ٹاؤن، بلدیہ ٹاؤن اور سعید آباد سمیت متعدد علاقوں میں شہری گھنٹوں بجلی سے محروم رہنے پر شدید پریشانی کا شکار ہیں۔
اسی طرح لیاقت آباد، ناظم آباد، گلبہار، رضویہ، پاک کالونی اور دیگر علاقوں کے مکینوں نے بھی مسلسل بجلی بندش پر شدید تحفظات کا اظہار کیا ہے۔ شہریوں کا کہنا ہے کہ شدید گرمی میں بجلی کی بندش نے گھروں میں رہنا دشوار بنا دیا ہے جبکہ کاروباری سرگرمیاں بھی متاثر ہو رہی ہیں۔
متعدد علاقوں میں بجلی کی طویل بندش کے باعث پانی کی فراہمی بھی متاثر ہو رہی ہے، جس سے شہریوں کو دوہری مشکلات کا سامنا ہے۔ متاثرہ مکینوں نے متعلقہ حکام سے فوری نوٹس لینے اور غیر اعلانیہ لوڈشیڈنگ کے خاتمے کا مطالبہ کیا ہے۔
