THE PUBLIC POST
کراچی میں پریس کانفرنس کرتے ہوئے وزیر اطلاعات سندھ شرجیل انعام میمن نے کہا ہے کہ منشیات کے خلاف کارروائیاں تیز کرنے اور حالیہ گرفتار خاتون ڈرگ ڈیلر انمول عرف پنکی کی گرفتاری پر اداروں کی حوصلہ افزائی ہونی چاہیے۔
انہوں نے کہا کہ جب وہ نارکوٹکس کی وزارت کے ذمہ دار تھے تو اس خاتون ڈرگ ڈیلر کا نام بھی سامنے آیا تھا اور اس وقت بھی اسے گرفتار کرنے کی کوشش کی گئی تھی، تاہم کامیابی حاصل نہیں ہو سکی۔ ان کا کہنا تھا کہ منشیات ایک بڑی لعنت ہے اور یہ معاشرے میں زہر پھیلانے کے مترادف ہے۔
شرجیل میمن نے مزید کہا کہ انمول عرف پنکی معاشرے میں منشیات کی فروخت میں مبینہ طور پر ملوث تھی اور اس کی گرفتاری ایک اہم پیش رفت ہے۔ انہوں نے بتایا کہ عدالت میں پیشی کے دوران غیر ذمہ داری کے معاملے پر متعلقہ اہلکاروں کو معطل کیا گیا ہے جبکہ پولیس کی جانب سے کوتاہی پر کارروائی بھی کی گئی ہے۔
انہوں نے کہا کہ ادارے منشیات کے خلاف کام کر رہے ہیں اور اس طرح کی کارروائیوں میں کسی بھی قسم کی غفلت برداشت نہیں کی جائے گی۔
