وزیراعظم کی سیلاب سے متاثرہ علاقوں میں امدادی سرگرمیاں تیز کرنے کی ہدایت

وزیراعظم شہباز شریف نے بارشوں اور سیلاب سے متاثرہ علاقوں میں امدادی سرگرمیاں تیز کرنے کی ہدایت کردی۔

وزیراعظم نے سیلابی صورتحال کے پیش نظر رہائشیوں کو محفوظ مقامات پر منتقل کرنے پر ریسکیو ٹیموں کی پذیرائی کی ہے۔

شہباز شریف نے نیشنل ڈیزاسٹر مینجمنٹ اتھارٹی (این ڈی ایم اے) اور ضلعی انتظامیہ کو غذر کے متاثرہ علاقوں میں ریسکیو آپریشن جاری رکھنے کی ہدایت کی ہے۔

وزیراعظم شہباز شریف کا خیبر پختونخوا حکومت کی مکمل معاونت کا حکم

وزیراعظم نے سیلابی صورتحال کے پیش نظر ملک کے زیریں علاقوں میں امدادی کارروائیوں کی تیاری رکھنے کی بھی ہدایت کی۔

انہوں نے کہا کہ دریاؤں، ندی نالوں، پانی کی قدرتی گزرگاہوں کے گرد تعمیرات کو روکنے کےلیے قومی سطح پر مہم چلائیں گے۔

شہباز شریف نے مزید کہا کہ حالیہ بارشوں اور سیلاب سے متاثرہ لوگوں کی مدد قومی فریضہ ہے، متاثرین کے ریسکیو اور امداد کے بعد بحالی کا کام شروع کیا جائے گا، متاثرین تک امدادی سامان کی فراہمی کو ہر حال میں یقینی بنایا جائے۔

وزیراعظم نے دریائے سندھ، ستلج میں گڈو، سکھر، جی ایس والا اور دیگر مقامات پر سیلابی صورتحال کے پیش نظر این ڈی ایم اے کے تمام پی ڈی ایم ایز سے رابطہ قائم کرنے کی ہدایت کی ۔

شہباز شریف نے گلوف کی قبل از وقت اطلاع دینے پر گلگت بلتستان کے علاقے غذر کے رہائشی وصیت خان کو خراج تحسین پیش کیا، جس کے بروقت آگاہ کرنے کے باعث جانی نقصان سے بچنا ممکن ہوا۔