منگل اور بدھ کی رات دریائے سندھ میں ممکنہ سیلاب کا خدشہ ہے: وزیراعلیٰ سندھ

وزیر اعلیٰ سندھ مراد علی شاہ نے کہا ہے کہ منگل اور بدھ کی رات دریائے سندھ میں ممکنہ سیلاب کا خدشہ ہے، دریا کے گرد بند اور نہری نظام کی کڑی نگرانی کی جائے۔

ترجمان وزیر اعلیٰ سندھ کے مطابق مراد علی شاہ کو وزیر آبپاشی جام خان شورو نے دریائی صورتِ حال پر بریفنگ دیتے ہوئے کہا کہ گڈو بیراج پر پانی کی آمد 3 لاکھ 83 ہزار اور اخراج 3 لاکھ 50 ہزار کیوسک ہے۔

بریفنگ میں بتایا گیا کہ سکھر بیراج پر پانی کی آمد 3 لاکھ 13 ہزار اور اخراج 2 لاکھ 59 ہزار کیوسک ہے جبکہ کوٹری بیراج پر پانی کی آمد 2 لاکھ 64 ہزار اور اخراج 2 لاکھ 33 ہزار کیوسک ہے۔ بیراجوں کی صورتِ حال ابھی تک بہتر ہے۔

اس موقع پر گفتگو کرتے ہوئے وزیراعلیٰ سندھ نے کہا کہ تمام متعلقہ محکمے اور انتظامیہ متحرک رہیں، صوبائی وزراء تمام اقدامات کی نگرانی کرتے رہیں۔

انہوں نے کہا کہ دریا کے کناروں یا کچے میں رہنے والے انتظامیہ سے تعاون کریں۔