THE PUBLIC POST
ایران کی بندرگاہ بندر عباس میں 23 مارچ کی شب ایک ٹگ بوٹ پر میزائل حملے میں جاں بحق ہونے والے پاکستانی نوجوان یاسر خان کی میت تفتان بارڈر سے سہراب گوٹھ ایدھی سرد خانے منتقل کر دی گئی۔
گورنر سندھ نہال ہاشمی بھی سرد خانے پہنچے اور مرحوم کے ورثا سے تعزیت کا اظہار کیا۔ یاسر خان کی نماز جنازہ بعد میں ماڑی پور میں ادا کی جائے گی۔
ماڑی پور کے ہاکس بے کے رہائشی یاسر خان روزگار کے سلسلے میں ایران گیا ہوا تھا اور وہاں کے بندرگاہ پر کام کر رہا تھا۔ حملے میں شہید ہونے کے بعد میت کو واپس لانے کے لیے حکومتی سطح پر کوششیں کی گئیں، جس میں پاکستان ایمبیسی اور وزیر اعلیٰ بلوچستان سرفراز بگٹی نے بھرپور تعاون فراہم کیا۔
گورنر سندھ نہال ہاشمی نے میڈیا سے گفتگو کرتے ہوئے کہا کہ غمزدہ خاندان کو تنہا نہیں چھوڑیں گے اور دکھ کی اس گھڑی میں ہم ان کے ساتھ ہیں۔ پیپلز پارٹی کے رہنما قادر پٹیل نے کہا کہ یاسر کی میت واپس لانا انتہائی مشکل مرحلہ تھا، مگر حکومتی تعاون کی بدولت یہ ممکن ہوا۔ مرحوم کے بھائی امجد نے کہا کہ وہ حکومت کے شکر گزار ہیں اور یاسر کی قربانی ہمیشہ یاد رکھی جائے گی۔
