کراچی: سٹی کونسل کے اجلاس میں گل پلازہ کا ملبہ اٹھانے کے لیے 3 کروڑ روپے جبکہ امام بارگاہوں اور جلوسوں کی گزرگاہوں پر ترقیاتی کام کروانے کے لیے 20 کروڑ روپے کی منظوری کی قرارداد منظور کرلی گئی۔

اجلاس میں اس کے علاوہ لیاری میں گورنمنٹ ڈگری گرلز کالج کی زمین کے حصول کے لیے این او سی جاری کرنے کی قرارداد بھی منظور کی گئی۔

مزید برآں کورنگی کراسنگ کے روڈ کی بحالی سے متعلق قرارداد کو بھی منظوری دے دی گئی، جس کے تحت علاقے میں سڑکوں کی مرمت اور بہتری کے اقدامات کیے جائیں گے۔

ارکانِ سٹی کونسل کا کہنا تھا کہ ان ترقیاتی منصوبوں سے شہری سہولیات میں بہتری آئے گی اور مختلف علاقوں میں درپیش مسائل کے حل میں مدد ملے گی۔