بفرزون کے شاپنگ سینٹر میں آگ بھڑک اٹھی،8 موٹر سائیکلیں بھی متاثر

آگ پر قابو پالیا گیا، کولنگ کا عمل جاری، جانی نقصان کی اطلاع نہیں

کراچی کے علاقے بفرزون میں واقع ایک شاپنگ سینٹر میں اچانک آگ بھڑک اٹھی، جس سے دو دکانیں اور متعدد موٹر سائیکلیں متاثر ہو گئیں۔

ریسکیو حکام کے مطابق آگ شاپنگ سینٹر کے کوریڈور میں قائم دو دکانوں میں لگی، جہاں شہریوں نے اپنی موٹر سائیکلیں بھی پارک کر رکھی تھیں۔ آگ کے باعث وہاں کھڑی 8 موٹر سائیکلیں بھی متاثر ہوئیں اور انہیں نقصان پہنچا۔

اطلاع ملتے ہی ریسکیو اور فائر بریگیڈ کی ٹیمیں موقع پر پہنچ گئیں اور امدادی کارروائیاں شروع کر دیں۔ فائر فائٹرز نے بروقت کارروائی کرتے ہوئے آگ کو مزید پھیلنے سے روک دیا۔

حکام کا کہنا ہے کہ آگ پر مکمل طور پر قابو پا لیا گیا ہے جبکہ متاثرہ مقام پر کولنگ کا عمل جاری ہے تاکہ دوبارہ آگ بھڑکنے کے خطرے کو ختم کیا جا سکے۔

ابتدائی اطلاعات کے مطابق واقعے میں کسی جانی نقصان کی اطلاع موصول نہیں ہوئی، تاہم آگ لگنے کی وجوہات جاننے کے لیے تحقیقات جاری ہیں۔