کراچی: سی ٹی ڈی کے نام پر وارداتیں کرنیوالی ’جعلی ٹیم‘ پکڑی گئی، اسلحہ، واکی ٹاکی، ہتھکڑی برآمد

کراچی کے علاقے صدر میں محکمہ انسداد دہشت گردی (سی ٹی ڈی) کے انٹیلی جنس ونگ نے کارروائی کرتے ہوئے مختصر مدت کے لیے اغوا میں ملوث 4 ملزمان کو گرفتار کرکے اسلحہ، واکی ٹاکی، ہتھکڑی اور گاڑی برآمد کرلی۔

اطلاعات کے مطابق سی ٹی ڈی حکام نے بتایا کہ گرفتار ملزمان کا گینگ خود کو سی ٹی ڈی اور حساس ادارے کا اہلکار ظاہر کرکے شہریوں کو اغوا کرکے تاوان وصول کرنے کی وارداتوں میں ملوث تھا۔

سی ٹی ڈی حکام کے مطابق گرفتار ملزمان شہریوں کو اغوا کرکے اسٹیل ٹاؤن لے جاتے تھے جہاں سے تاوان کے بعد رہائی ملتی تھی، ملزمان میں امتیاز عرف سلمان، عبید عرف آبی، شاہد عرف موسیٰ اور سلیم شامل ہیں۔

گرفتار کیے گئے ملزمان سے کالے رنگ کی ویگو، جس پر جعلی سرکاری نمبر پلیٹ لگی تھی، برآمد ہوئی، ملزمان نے 4 اپریل کو پی آئی بی کالونی سے اسمٰعیل کو اغوا کرکے اس سے بٹ کوائن کے بارے میں معلومات لیں اور دھمکیاں دے کر رقم بعد میں لینے کا کہہ کر چھوڑ دیا۔

20 اپریل کو ملزمان نے ہجرت کالونی سے فیصل کو اغوا کیا، اور اس کے اے ٹی ایم اور ایزی پیسہ سے 5 لاکھ روپے نکلوا کر اس کو شاہراہ قائدین پر چھوڑ دیا۔

تیسری واردات میں ملزمان نے اورنگی ٹاؤن میں ایک فیکٹری میں جاکر کسٹم اور دیگر محکموں کا نام لے کر بلیک میل کرکے 7 لاکھ روپے وصول کیے، گرفتار ملزمان سے مزید تفتیش جاری ہے۔