اب بھارت کو سبق سکھانے کا وقت آ گیا ہےمولانا عبدالغفور حیدری

جمعیت علمائے اسلام (جے یو آئی) کے سیکریٹری جنرل مولانا عبدالغفور حیدری کا کہنا ہے کہ بھارت نے جنگ چھیڑ دی ہے، اب اسے سبق سکھانے کا وقت آ گیا ہے۔

اسلام آباد میں جے یو آئی کے سیکریٹری جنرل مولانا عبدالغفور حیدری نے مظاہرے سے خطاب کرتے ہوئے کہا کہ بھارت نے انتخابات میں فائدہ اٹھانا تھا تو فالس فلیگ آپریشن کیا۔

ان کا کہنا ہے کہ پاکستان نے تحقیقات کی پیشکش کردی، تاہم بھارت نے تاحال اس پیشکش کوسنجیدہ نہیں لیا، سیاسی جماعتوں نے تمام اختلافات بھلا دیے، ہم مسلح افواج کے ساتھ کھڑے ہیں۔

مولانا عبدالغفور حیدری کا کہنا ہے کہ اس وقت قوم سیسہ پلائی دیوار بن چکی ہے، یہ جنگ شروع بھارت نے کی ہے لیکن اس کو ختم ہم کریں گے، مودی کو ایسا سبق ملنے والا ہے کہ وہ دوبارہ جنگ کانام نہیں لے گا۔

جمعیت علمائے اسلام (جے یو آئی) کے سیکریٹری جنرل نے یہ بھی کہا ہے کہ بھارت اسرائیل کی طرز پر بچوں اور مدارس کو نشانہ بنا رہا ہے، مودی صلح کے لیے امریکا اور دوسرے ممالک کی منتیں کر رہا ہے۔