THE PUBLIC POST
راولپنڈی: انسداد دہشت گردی عدالت نے پاکستان تحریک انصاف کے بانی عمران خان کی ہمشیرہ علیمہ خان کا شناختی کارڈ بحال کرنے کا حکم دے دیا۔
اے ٹی سی کے جج امجد علی شاہ نے راولپنڈی میں 26 نومبر احتجاج کیس میں علیمہ خان کے خلاف کیس کی سماعت کی جہاں ان کی حاضری سے استثنیٰ کی درخواست پر فریقین کے وکلاء نے دلائل مکمل کئے۔
پراسیکیوٹر ظہیر علی شاہ نے علیمہ خان کی مسلسل عدم حاضری کی مخالفت کرتے ہوئے مؤقف اختیار کیا کہ وہ گزشتہ دو ماہ سے پیش نہیں ہو رہیں، لہٰذا قانونی کارروائی کو آگے بڑھایا جائے۔
دوسری جانب وکیل صفائی نے مؤقف اپنایا کہ علیمہ خان کا شناختی کارڈ بلاک ہے، جس کے باعث انہیں آمدورفت میں مشکلات کا سامنا ہے اور عدالت سے شناختی کارڈ کی بحالی کا حکم دینے کی استدعا کی۔
بعد ازاں عدالت نے فیصلہ سناتے ہوئے علیمہ خان کی حاضری معافی کی درخواست منظور کر لی اور کیس کی سماعت 20 اپریل تک ملتوی کر دی، عدالت نے آئندہ سماعت پر علیمہ خان اور تفتیشی افسر کو طلب کر لیا، جبکہ وکیل کو آخری گواہ پر جرح مکمل کرنے کی ہدایت بھی دی گئی۔
عدالت نے علیمہ خان کے بلاک شناختی کارڈ کی بحالی کے لئے دوبارہ حکم بھی جاری کر دیا۔
