اذان اویس اور شامل حسین نے رنز کی دوڑ میں سب کو پیچھے چھوڑ دیا

اسلام آباد(پبلک پوسٹ)پاکستان کے ابھرتے ہوئے کرکٹ اسٹارز اذان اویس اور شامل حسین نے انگلینڈ کے خلاف حالیہ شاہینز سیریز میں شاندار کارکردگی کے ذریعے رنز کی دوڑ میں سب کو پیچھے چھوڑ دیا۔

قومی ٹیسٹ ٹیم کے نائب کپتان سعود شکیل کی قیادت میں پاکستان شاہینز نے تین میچوں کی ون ڈے سیریز 1-2 سے جیتی جبکہ دو تین روزہ میچ بارش کی نذر ہوکر بغیر نتیجہ ختم ہوئے۔

سیریز کینٹ، ہوو اور کینٹربری کے میدانوں میں کھیلی گئی جہاں نوجوان کھلاڑیوں نے مستقل مزاجی اور زبردست شراکت داریوں کے ذریعے میچز پر اپنی گرفت مضبوط رکھی۔اذان نے سات اننگز میں 276 رنز کے ساتھ سب سے زیادہ رنز بنائے جبکہ شامل حسین جو ابتدائی دو میچز میں نہیں کھیلے، نے پانچ اننگز میں 193 رنز اسکور کیے، دونوں کی بیٹنگ اوسط تقریباً 39 رہی۔

سیریز کے فیصلہ کن تیسرے ون ڈے میں ان دونوں نے 100 سے زائد رنز کی شراکت قائم کی جو 261 رنز کے ہدف کے تعاقب کی بنیاد بنی اور میچ کا پانسہ پلٹ دیا۔

تین روزہ میچز بارش سے متاثر ہوئے تاہم اس دوران روہیل نذیر اور علی ذریاب نے سنچریاں اسکور کیں جبکہ عامر حمزہ، عبید شاہ، موسیٰ خان اور میران ممتاز نے باؤلنگ میں اچھی کارکردگی دکھائی۔بیٹنگ کے مجموعی اعزازات بھی اذان اور شامل نے اپنے نام کیے۔ پی سی بی ویب سائٹ کے مطابق شامل نے تین میچز کی مشترکہ کارکردگی میں اپنی ٹیم کے لیے سب سے زیادہ رنز بنائے۔

شامل حسین سیریز میں مجموعی طور پر انگلینڈ کے لوک بینکنسٹین (197 رنز) کے بعد دوسرے نمبر پر رہے۔ دیگر نمایاں بلے بازوں میں علی ذریاب (166)، حیدر علی (159)، روہیل نذیر (136)، سعود شکیل (128) اور محمد سلیمان شامل تھے، جبکہ عمیر بن یوسف (77) اور معاذ صداقت (61) نے بھی کچھ رنز بنائے۔

شامل حسین کا اسٹرائیک ریٹ 74 جبکہ اذام کا 53 رہا، جو ان کے بیٹنگ انداز کی عکاسی کرتا ہے شمائل دلکش اسٹروک پلیئر جبکہ اذان تحمل سے کھیلنے والے بلے باز کے طور پر سامنے آئے۔

یہی دونوں کھلاڑی گزشتہ سال کے فرسٹ کلاس سیزن میں بھی رنز لسٹ میں نمایاں رہے۔ اذان نے قائدِ اعظم ٹرافی میں 844 رنز بنا کر سرفہرست رہے اور اپنی ٹیم سیالکوٹ کو ٹائٹل جتوانے میں اہم کردار ادا کیا، جبکہ شامل حسین نے صدر ٹرافی میں 727 رنز کے ساتھ دوسرا نمبر حاصل کیا، جس میں ٹورنامنٹ کی تیز ترین ڈبل سنچری بھی شامل تھی۔