پاکستانی معیشت کیلئے بڑی خوشخبری

اسلام آباد : پاکستان میں شرحِ سود سنگل ڈیجٹ میں آگئی ہے، ریکارڈ 22 فیصد تک پہنچنے والا پالیسی ریٹ 2سال کے اندر اندر 10 فیصد سے نیچے آگیا۔

تفصیلات کے مطابق پاکستانی معیشت کے لیے مثبت پیش رفت سامنے آ گئی ہے، جہاں شرحِ سود سنگل ڈیجٹ میں آ گئی ہے۔ حکومت کی سنجیدہ معاشی پالیسیوں اور اصلاحات کے ثمرات اب واضح طور پر سامنے آنا شروع ہو گئے ہیں۔

اسٹیٹ بینک کی جانب سے ہونے والی تازہ ٹی بل نیلامی میں شرحِ سود 10 فیصد سے بھی نیچے آ گئی، رپورٹ کے مطابق ایک وقت میں ریکارڈ 22 فیصد تک پہنچنے والا پالیسی ریٹ دو سال کے اندر اندر 10 فیصد سے کم ہو گیا ہے۔

حکومتی قرض کے لیے ہونے والی بولیوں میں شرحِ منافع 9.89 فیصد رہی، جو گزشتہ نیلامی کے مقابلے میں 0.30 فیصد کم ہے۔ ٹاپ لائن کے مطابق تین ماہ کے ٹی بل پر منافع کی شرح 9.89 فیصد رہی، جس میں 0.25 فیصد کمی ریکارڈ کی گئی۔

اسی طرح چھ ماہ کے ٹی بل پر شرحِ منافع 9.94 فیصد رہی، جہاں بھی کمی دیکھنے میں آئی ہے۔ ماہرین کے مطابق شرحِ سود میں یہ کمی معاشی استحکام، سرمایہ کاری اور کاروباری سرگرمیوں کے لیے خوش آئند قرار دی جا رہی ہے۔