ہماری فوج عظیم، منگل کی ڈیڈ لائن حتمی ہے، ٹرمپ

امریکی صدر Donald Trump نے اعلان کیا ہے کہ منگل کی مقررہ ڈیڈ لائن حتمی ہے، اور امریکی افواج کو دنیا کی سب سے طاقتور فوج قرار دیا۔

خبر رساں اداروں کے مطابق وائٹ ہاؤس میں ایسٹر ایگ رول کی سالانہ تقریب منعقد ہوئی، جس کی میزبانی صدر ٹرمپ اور خاتون اول Melania Trump نے کی۔

تقریب سے خطاب کرتے ہوئے صدر ٹرمپ نے کہا کہ وہ آج ایک پریس کانفرنس سے بھی خطاب کریں گے۔ ان کا کہنا تھا کہ جاری آپریشن کا مقصد نظام میں تبدیلی (رجیم چینج) تھا، اور منگل کی ڈیڈ لائن کو حتمی حیثیت حاصل ہے، جبکہ امریکہ کی جانب سے پیش کردہ تجاویز نہایت اہم ہیں۔

انہوں نے مزید کہا کہ اگر ایران مناسب اقدامات کرے تو جنگ فوری طور پر ختم ہو سکتی ہے۔

صدر ٹرمپ نے یہ بھی عندیہ دیا کہ ضرورت پڑنے پر ایران کے تیل کے وسائل پر کنٹرول حاصل کیا جا سکتا ہے، اور اگر انہیں اختیار حاصل ہوتا تو وہ یہ اقدام کر چکے ہوتے۔ ان کے مطابق تہران کے پاس اب محدود تعداد میں میزائل اور ڈرونز باقی رہ گئے ہیں۔

یاد رہے کہ ایک حالیہ بیان میں صدر ٹرمپ نے خبردار کیا تھا کہ منگل کا دن ایران میں پاور پلانٹس اور پلوں کے لیے فیصلہ کن ثابت ہو سکتا ہے، اور دونوں اہداف بیک وقت نشانہ بن سکتے ہیں۔

مزید برآں، انہوں نے ایران کو تنبیہ کرتے ہوئے کہا تھا کہ آبنائے ہرمز کو کھلا رکھا جائے، بصورت دیگر سنگین نتائج کا سامنا کرنا پڑ سکتا ہے۔