چیمپئنز ٹرافی؛ قذافی اسٹیڈیم آنیوالے شائقین کیلیے خاص ہدایات

لاہور(پبلک پوسٹ)چیمپئنز ٹرافی کے اہم میچ کے سلسلے میں قذافی اسٹیڈیم آنے والے شائقین کے لیے خاص ہدایات جاری کردی گئیں۔پاکستانی کی میزبانی میں جاری بین الاقوامی میگا ایونٹ کے سلسلے میں انگلینڈ اور آسٹریلیا کے مابین قذافی اسٹیڈیم میں ہونے والے میچ کے حوالے سے ٹریفک اور سکیورٹی انتظامات مکمل کرکے باضابطہ طور پر پلان جاری کردیا گیا ہے۔سی ٹی او لاہور کے مطابق میچ کے دوران ایک ہزار سے زائد ٹریفک پولیس اہلکار ڈیوٹی سرانجام دیں گے۔ انہوں نے کہا کہ رانگ پارکنگ ہرگز نہیں ہونے دی جائے گی، جس کے لیے 20 فورک لفٹرز،4 بریک ڈاؤنز ہوں گے جو ہر وقت تیار رہیں گے۔
پارکنگ پلان
ڈیفنس سے آنے والے شائقین فردوس مارکیٹ سے سینٹر پوائنٹ سے لیفٹ ٹرن لے کر CBD میں گاڑیاں پارک کریں گے ۔ فیروزپور روڈ سے آنے والےکلمہ چوک سے ٹرن لے کر نیشنل پارک سے گورنمنٹ کالج گلبرگ میں پارک کریں گے۔ ڈیفنس، کینٹ سے آنے والے شرکا حسین چوک کی طرف سے یا شیر پاو برج سے ہوتے ہوئے مین بلیوارڈ گلبرگ سے لبرٹی پارکنگ میں پارک کریں گے۔اسی طرح مغل پورہ، گڑھی شاہو سے آنے والے مین بلیوارڈ گلبرگ سے سن فورٹ ہوٹل لبرٹی پارکنگ میں پارک کریں گے۔ ٹریفک حکام کے مطابق کسی بھی روڈ کو مستقل طور پر بند نہیں رکھا جائے گا۔ تمام سڑکیں بشمول مال روڈ، جیل روڈ اور کینال روڈ ٹریفک کے لیے کھلی رہیں گی۔ اسی طرح فیروز پور روڈ اور مین بلیووارڈ گلبرگ پر بھی ٹریفک معمول کے مطابق جاری رہے گا۔حکام کاکہنا ہے کہ شہریوں اور شائقین کرکٹ کو ٹریفک کا کوئی مسئلہ نہیں ہوگا۔ شہری گاڑیوں کی رانگ پارک ہرگز نہ کریں اور مقرر کردہ پارکنگ اسٹینڈز ہی میں اپنی گاڑی پارک کریں۔ ٹریفک کے لیے راستہ ایپ،راستہ ایف ایم 88.6 کے ذریعے شہریوں کو آگاہ رکھا جائے گا۔
سکیورٹی پلان
دریں اثنا پنجاب پولیس نے بھی ایونٹ کے حوالے سے اپنا پلان جاری کردیا ہے۔ آئی جی پنجاب ڈاکٹر عثمان انور نے کھلاڑیوں، آفیشلز، شائقین کرکٹ کو بھرپور سکیورٹی فراہم کرنے کی ہدایات جاری کردی ہیں۔ انہوں نے کہا کہ انٹرنیشنل ایونٹ کی سکیورٹی کے پیش نظر ملک دشمن عناصر پر کڑی نظر رکھیں۔آئی جی پنجاب نے کہا کہ پاکستان کرکٹ بورڈ، ضلعی انتظامیہ، سکیورٹی ایجنسیز سمیت تمام اداروں سے کوآرڈینیشن مکمل ہے۔ آسٹریلیا اور انگلینڈ کے میچ کی سکیورٹی پر 12ہزار سے زائد پولیس افسران و اہلکار تعینات ہوں گے۔ اس دوران کھلاڑیوں کی رہائش گاہ، روٹس، اسٹیڈیم، اردگرد کی بلند عمارتوں پر اسنائپرز تعینات ہوں گے۔اسی طرح ڈولفن اسکواڈ، پولیس ریسپانس یونٹ، ایلیٹ ٹیمیں روٹس و اہم مقامات کے گرد موثر پٹرولنگ کریں گی جب کہ سیف سٹیز کیمروں کی مدد سے ٹیموں کے روٹس، اسٹیڈیم سمیت اہم مقامات کی مسلسل مانیٹرنگ کی جائے گی۔