THE PUBLIC POST
چینی فوڈ بلاگر کائی نان اپنی منفرد تخلیقات کے باعث ایک بار پھر سوشل میڈیا پر توجہ کا مرکز بن گئے، جب انہوں نے شیشے جیسا نظر آنے والا نیم شفاف فرائیڈ چکن تیار کیا۔
یہ انوکھی ڈش، جو چین سے تعلق رکھنے والے بلاگر کی تخلیق ہے، دیکھنے میں کسی فن پارے کی مانند محسوس ہوتی ہے۔ کائی نان نے اسے مالیکیولر گیسٹرونومی کی جدید تکنیکوں کے ذریعے تیار کیا، جس میں چکن کو تحلیل کر کے دوبارہ تشکیل دیا گیا۔
ان کی ویڈیو، جو یوٹیوب پر شیئر کی گئی، نے کم وقت میں تقریباً 10 لاکھ ویوز حاصل کیے اور اپنی غیر معمولی نوعیت کے باعث وائرل ہوگئی۔ ویڈیو میں انہوں نے چکن کی ہڈیوں، کولیجن اور دیگر اجزاء کو استعمال کرتے ہوئے شفاف ساخت بنانے کا مکمل عمل بھی دکھایا۔
یہ تخلیق جہاں کچھ افراد کے لیے حیرت اور تجسس کا باعث بنی، وہیں کئی صارفین نے اسے غیر معمولی اور ناقابلِ قبول بھی قرار دیا۔ تاہم، اس میں کوئی شک نہیں کہ یہ ڈش جدید کھانوں کی دنیا میں ایک منفرد اضافہ ہے۔
