THE PUBLIC POST
کراچی کے علاقے گارڈن میں پولیس اور حساس اداروں نے مشترکہ کارروائی کرتے ہوئے مبینہ طور پر لیاری گینگ وار سے تعلق رکھنے والے 4 مطلوب ملزمان کو گرفتار کر لیا۔
ایس ایس پی ایسٹ کے مطابق یہ کارروائی خفیہ اطلاع پر عمل میں لائی گئی، جس کے دوران گرفتار ملزمان کے قبضے سے 8 پستول، ساڑھے 6 کلوگرام سے زائد منشیات اور 5 موبائل فونز برآمد کیے گئے۔
پولیس حکام کا کہنا ہے کہ گرفتار افراد شہر میں آن لائن منشیات سپلائی کا ایک منظم نیٹ ورک چلا رہے تھے اور خاص طور پر مختلف تعلیمی اداروں میں منشیات فراہم کرنے میں ملوث تھے۔
ابتدائی تفتیش کے مطابق ملزمان کا تعلق شہر میں سرگرم جرائم پیشہ گروہوں سے ہے اور ان کے نیٹ ورک کے تانے بانے دیگر علاقوں تک بھی پھیلے ہوئے ہیں۔ حکام کا کہنا ہے کہ مزید تحقیقات جاری ہیں اور نیٹ ورک کے دیگر کارندوں کی گرفتاری کے لیے چھاپے مارے جا رہے ہیں، جبکہ شہر میں منشیات کے خلاف کارروائیوں کو مزید تیز کیا جائے گا۔
