کراچی, جیولر شاپ پر چھاپہ،ڈی جی ایف آئی اے کا نوٹس انسپکٹر اقبال معطل

کراچی: شہر میں جیولر شاپ پر مبینہ چھاپے اور اختیارات کے ناجائز استعمال کے معاملے پر ڈی جی ایف آئی اے نے فوری نوٹس لیتے ہوئے سخت کارروائی کا حکم دے دیا ہے۔

ذرائع کے مطابق واقعے کی ابتدائی انکوائری کے بعد متعلقہ انسپکٹر اقبال کو فوری طور پر معطل کر دیا گیا ہے جبکہ معاملے کی مزید تحقیقات شروع کر دی گئی ہیں۔ حکام کا کہنا ہے کہ چھاپے کے دوران قواعد و ضوابط کی مبینہ خلاف ورزی کی گئی جس پر محکمانہ کارروائی عمل میں لائی گئی۔

ڈی جی ایف آئی اے نے واضح کیا ہے کہ کسی بھی اہلکار کو اختیارات سے تجاوز کرنے کی اجازت نہیں دی جائے گی اور شفاف انکوائری کے ذریعے ذمہ داران کا تعین کیا جائے گا۔

دوسری جانب جیولر شاپ کے مالکان نے مؤقف اختیار کیا ہے کہ کارروائی کے دوران انہیں غیر ضروری ہراسانی کا سامنا کرنا پڑا، تاہم ادارے کی جانب سے معاملے کی مکمل چھان بین جاری ہے۔

مزید پیش رفت انکوائری رپورٹ سامنے آنے کے بعد متوقع ہے۔