THE PUBLIC POST
کراچی کے علاقے نارتھ کراچی میں چوری ہونے والا قربانی کا بیل شہریوں نے تلاش کرکے برآمد کرلیا۔
پولیس کے مطابق گزشتہ روز تھانہ سرسید کی حدود سے چوری ہونے والے بیل کو پاور ہاؤس چورنگی کے قریب سے برآمد کیا گیا۔ شہریوں نے کارروائی کرتے ہوئے 5 مشتبہ ملزمان کو پکڑ کر پولیس کے حوالے کردیا۔
سامنے آنے والی ویڈیو میں ایک ملزم نے انکشاف کیا کہ اس نے نشے کی لت پوری کرنے کے لیے بیل 20 ہزار روپے میں فروخت کیا تھا۔
پولیس کا کہنا ہے کہ مشتعل افراد نے ملزمان کو پکڑنے کے بعد تشدد کا نشانہ بنایا اور بعد ازاں انہیں تھانے منتقل کردیا گیا۔ واقعے کا مقدمہ تھانہ سرسید میں درج کرلیا گیا ہے۔
واضح رہے کہ گزشتہ روز سامنے آنے والی سی سی ٹی وی فوٹیج میں دو ملزمان کو علی الصبح بیل چوری کرکے فرار ہوتے دیکھا گیا تھا، جس کے بعد شہریوں میں شدید غم و غصہ پایا جارہا تھا۔
