THE PUBLIC POST
کراچی میں شارع فیصل پر پولیس آفس کے قریب ٹریفک حادثے میں ایک کمسن بچہ جاں بحق ہو گیا۔ پولیس کے مطابق بچہ اپارٹمنٹ کے باہر سائیکل چلا رہا تھا کہ اسی دوران ایک تیز رفتار ٹریکٹر نے اسے ٹکر مار دی۔
حادثے کے نتیجے میں بچہ شدید زخمی ہو گیا اور موقع پر ہی دم توڑ گیا۔ واقعے کے بعد علاقے میں کہرام مچ گیا جبکہ اہل خانہ غم سے نڈھال ہو گئے۔
پولیس کا کہنا ہے کہ حادثے کے بعد ٹریکٹر ڈرائیور موقع سے فرار ہونے کی کوشش کر رہا تھا، تاہم فوری کارروائی کرتے ہوئے اسے گرفتار کر لیا گیا۔ پولیس نے ڈرائیور کو تحویل میں لے کر واقعے کی مزید تحقیقات شروع کر دی ہیں۔
شہریوں نے شہر میں بھاری گاڑیوں کی بے احتیاطی اور ٹریفک قوانین کی خلاف ورزیوں پر تشویش کا اظہار کرتے ہوئے متعلقہ حکام سے سخت اقدامات کا مطالبہ کیا ہے تاکہ ایسے افسوسناک واقعات کی روک تھام ممکن بنائی جا سکے۔
