سچل افضل کس اداکار سےمقابلہ کرنا چاہتے ہیں؟

پاکستان کے معروف ماڈل اور ابھرتے ہوئے اداکار سچل افضل نے مایہ ناز سینئر اداکار نعمان اعجاز سے مقابلے کی خواہش کا اظہار کر دیا۔

حال ہی میں سچل افضل نے مبشر ہاشمی کی میزبانی میں جیو ٹی وی کی پوڈکاسٹ میں شرکت کی، جہاں انہوں نے لیجنڈری اداکار نعمان اعجاز کے ساتھ مقابلہ کرنے کی اپنی خواہش کا اظہار کیا۔

اس حوالے سے گفتگو کرتے ہوئے سچل افضل نے کہا کہ اگر مجھے میڈیا میں کسی اداکار سے مقابلہ کرنا ہو تو میرے ذہن میں ایک نام ہے، اگرچہ میں جانتا ہوں کہ اداکاری کوئی مقابلہ نہیں، لیکن اگر مجھے کسی ایک اداکار کے ساتھ مقابلہ کرنا ہو تو وہ صرف نعمان اعجاز ہیں۔

انہوں نے کہا کہ نعمان اعجاز ایک شاندار اداکار ہیں، مجھے ابھی تک ان کے ساتھ کام کرنے کا موقع نہیں ملا، لیکن ایک دن ضرور ان کے ساتھ کام کروں گا، میں ان کے ساتھ ون آن ون مقابلہ کرنا چاہتا ہوں۔

اداکار نے یہ بھی کہا کہ میں جانتا ہوں کہ میں ہار جاؤں گا، لیکن یہ میرے لیے سیکھنے کا ایک بہترین تجربہ ہو گا، ان کے ساتھ کام کرنا یقیناً بہت مزے دار ہو گا، کیونکہ وہ ایک بہترین اداکار ہیں۔