مدینہ سے کراچی کے لیے سستی ایئرلائن کی پروازوں کا آغاز

سعودی عرب کی کم لاگت فضائی کمپنی فلائی آڈیل نے مدینہ منورہ اور کراچی کے درمیان اپنی نئی پروازوں کا باقاعدہ آغاز کر دیا ہے، جس کے تحت دونوں شہروں کے درمیان ہفتے میں دو پروازیں چلائی جائیں گی۔ نئی سروس کا آغاز اتوار کو ہوا اور مدینہ سے آنے والی پہلی پرواز کراچی پہنچ گئی۔

نئی پروازوں کے لیے ایئربس اے 320 نیو طیارے استعمال کیے جائیں گے۔ ان طیاروں میں 186 مسافروں کے بیٹھنے کی گنجائش ہے اور تمام نشستیں اکانومی کلاس کی ہیں۔ ہر نشست پر یو ایس بی-اے یا یو ایس بی-سی کے ذریعے موبائل اور دیگر آلات چارج کرنے کی سہولت موجود ہے۔ طیاروں میں سامان رکھنے کے لیے بڑے اوورہیڈ بنز اور مسافروں کے سفر کو زیادہ آرام دہ بنانے کے لیے جدید موڈ لائٹنگ بھی فراہم کی گئی ہے۔

کراچی کے لیے مدینہ کی نئی پرواز کے بعد فلائی آڈیل کے بین الاقوامی نیٹ ورک میں پاکستان سے منسلک روٹس کی تعداد سات ہوگئی ہے۔ کمپنی نے گزشتہ سال پاکستان کی فضائی مارکیٹ میں داخل ہوتے وقت صرف دو روٹس سے اپنی پروازوں کا آغاز کیا تھا۔

مدینہ منورہ اب ریاض کے بعد سعودی عرب کا دوسرا شہر بن گیا ہے جہاں سے فلائی آڈیل کی بین الاقوامی پرواز کے ذریعے کراچی پہنچا جا سکتا ہے۔ نئی سروس سے دونوں ممالک کے درمیان فضائی رابطوں میں مزید اضافہ ہوگا، جبکہ مسافروں کو سفر کے لیے ایک اضافی آپشن بھی دستیاب ہوگا۔

فلائی آڈیل کے مطابق مدینہ اور کراچی کے درمیان سروس کمپنی کی بین الاقوامی توسیع کی وسیع حکمت عملی کا حصہ ہے۔ کمپنی خطے کی مختلف مارکیٹوں میں اپنا فضائی نیٹ ورک بڑھانے پر توجہ دے رہی ہے۔

کمپنی نے سعودی وژن دوہزار تیس کے مطابق سال 2030 تک اپنے فضائی نیٹ ورک اور طیاروں کے بیڑے کو موجودہ حجم کے مقابلے میں دوگنا سے زیادہ کرنے کا منصوبہ بنایا ہے۔ اس توسیعی منصوبے کے تحت 2027 سے نئے ایئربس اے 321 نیو اور وسیع جسامت کے ایئربس اے 330-900 نیو طیارے بھی موجودہ اے 320 طیاروں کے بیڑے میں شامل کیے جانے کی توقع ہے۔