ریاض ایئرپورٹ پر حوثی میزائل حملہ، طیارے کو آگ لگ گئی، خمیص میں سکول متاثر

ریاض: سعودی عرب کے دارالحکومت ریاض کے کنگ خالد انٹرنیشنل ایئرپورٹ پر میزائل حملے کے بعد سعودی ایئرلائن کے ایک طیارے میں آگ بھڑک اٹھی، جس سے طیارے کو شدید نقصان پہنچا۔

خبر ایجنسی رائٹرز کے مطابق طیارہ ایئرپورٹ پر کھڑا تھا اور واقعے کے وقت اس میں کوئی مسافر موجود نہیں تھا، تاہم حکام سے فوری طور پر جانی نقصان کی تصدیق نہیں ہوسکی۔

حوثی ملیشیا نے ریاض ایئرپورٹ اور سعودی تنصیبات کو نشانہ بنانے کا دعویٰ کیا ہے، جبکہ گروپ کی جانب سے سعودی عرب پر مزید حملوں کی دھمکی بھی دی گئی ہے۔

دوسری جانب سعودی قیادت میں قائم اتحاد نے ریاض کی جانب آنے والے بیلسٹک میزائلوں کو روکنے کا دعویٰ کیا ہے، ایئرپورٹ پر حملے کے بعد پروازوں کا نظام بھی متاثر ہوا۔

میزائل کا ملبہ گرنے سے سکول اور میڈیکل کمپلیکس کونقصان پہنچا لیکن کوئی جانی نقصان نہیں ہوا، خمیس مشیط میں بھی اتحادی فوج نے دو بیلسٹک میزائل مار گرائے۔

ریاض اور ابہا ایئرپورٹ پر گزشتہ روز حملوں میں تین افراد جاں بحق اور ایک پاکستانی سمیت 28 زخمی ہوئے۔