کافی کی مخصوص مقدار ڈپریشن کے خطرات میں کمی کر سکتی ہے: تحقیق

ایک حالیہ تحقیق کے مطابق کافی کا معتدل استعمال ذہنی صحت پر مثبت اثرات مرتب کر سکتا ہے اور بے چینی و ڈپریشن کے خطرات میں کمی سے منسلک پایا گیا ہے۔

Fudan University کے ماہرین کی جانب سے کی گئی اس تحقیق میں یہ بات سامنے آئی کہ وہ افراد جو روزانہ دو سے تین کپ کافی پیتے ہیں، ان میں ذہنی مسائل کا خطرہ نسبتاً کم ہو سکتا ہے۔

تحقیق کے مطابق کافی میں موجود کیفین وقتی طور پر مزاج کو بہتر بنانے میں مدد دیتی ہے، جبکہ اس میں شامل اینٹی آکسیڈنٹس اور سوزش کم کرنے والی خصوصیات دماغی نظام پر مثبت اثر ڈال سکتی ہیں۔

تاہم محققین نے اس بات پر زور دیا کہ اعتدال نہایت اہم ہے۔ روزانہ پانچ یا اس سے زیادہ کپ کافی کا استعمال ذہنی صحت کے لیے نقصان دہ ہو سکتا ہے اور بے چینی و ڈپریشن کے خطرات میں اضافے کا باعث بن سکتا ہے۔

ماہرین کے مطابق بے چینی اور ڈپریشن جیسے مسائل کئی عوامل کے پیچیدہ امتزاج کا نتیجہ ہوتے ہیں، جن میں ذہنی دباؤ، صدمہ، سماجی تنہائی اور جینیاتی رجحان شامل ہیں۔