THE PUBLIC POST
کراچی کے علاقے سعودآباد میں اپنی ہی بہن اور بہنوئی کو فائرنگ کرکے قتل کرنے والے ملزم کا ویڈیو بیان سامنے آگیا ہے، جس میں اس نے واردات کا اعتراف کرتے ہوئے اسے غیرت کے نام پر قتل قرار دیا ہے۔
پولیس کو دیے گئے ویڈیو بیان میں ملزم نے بتایا کہ اس نے اپنی بہن نادیہ کی منگنی امجد گوپانگ نامی شخص سے 3 لاکھ 50 ہزار روپے کے عوض کروائی تھی، تاہم نادیہ بعد ازاں گھر سے فرار ہوگئی اور اپنی پسند سے نبی اللہ کے ساتھ شادی کرلی۔
ملزم کے مطابق نادیہ کی پسند کی شادی کے بعد امجد گوپانگ اپنی رقم کی واپسی کا مطالبہ کررہا تھا، جس پر وہ شدید دباؤ اور غصے میں تھا۔
پولیس کے مطابق ملزم نے اعتراف کیا کہ اس نے ملیر کورٹ سے واپسی کے دوران اپنی بہن نادیہ اور بہنوئی نبی اللہ پر فائرنگ کی، جس کے نتیجے میں دونوں جاں بحق ہوگئے۔
ابتدائی تحقیقات کے مطابق مقتول جوڑا نئی شادی شدہ زندگی گزار رہا تھا، جبکہ ملزم نے واردات کو غیرت کے نام پر قتل قرار دیا ہے۔ پولیس واقعے کے مختلف پہلوؤں پر مزید تحقیقات کررہی ہے۔
