THE PUBLIC POST
ایڈیشنل ڈسٹرکٹ اینڈ سیشن جج جنوبی کراچی کی عدالت نے بیوی کو تیزاب پھینک کر جھلسانے کے کیس کی سماعت کرتے ہوئے مجرم شوہر ساجد کو مجموعی طور پر 24 سال قید کی سزا سنا دی۔
عدالت نے مجرم پر مجموعی طور پر 10 لاکھ روپے سے زائد جرمانہ بھی عائد کر دیا۔
دورانِ سماعت پراسیکیوٹر عائشہ سعید نے دلائل دیتے ہوئے کہا کہ متاثرہ خاتون کی ملزم سے 12 سال قبل شادی ہوئی تھی اور ان کے 3 بچے ہیں، شوہر سے لڑائی جھگڑے کے بعد خاتون میکے میں رہ رہی تھی۔
پراسیکیوٹر عائشہ سعید نے عدالت کو بتایا کہ ستمبر 2021ء میں مجرم نے سسرال جا کر بیوی پر تیزاب پھینک دیا تھا۔
عدالت نے اپنے حکم میں کہا کہ استغاثہ مجرم پر جرم ثابت کرنے میں کامیاب رہا ہے۔
واضح رہے کہ مجرم کے خلاف تھانہ ڈیفنس میں مقدمہ درج کیا گیا تھا۔
