THE PUBLIC POST
کراچی کے علاقے اورنگی ٹاؤن کے تھانہ مومن آباد کی حدود فرید کالونی میں پولیس نے شہری کے قتل کا مقدمہ 12 گھنٹوں سے بھی کم وقت میں حل کرتے ہوئے تین ملزمان کو گرفتار کرلیا۔
ایس ایس پی ویسٹ طارق الٰہی مستوئی کے مطابق ملزمان نے فائرنگ کرکے 30 سے 35 سالہ فہد ولد ظہیر عباس کو قتل کیا تھا۔ واقعے کی اطلاع ملتے ہی پولیس نے جائے وقوعہ کا دورہ کیا اور شواہد، عینی بیانات اور دیگر معلومات کی بنیاد پر فوری کارروائی عمل میں لائی۔
پولیس حکام کے مطابق تحقیقات کے دوران قتل میں ملوث تینوں ملزمان کو حراست میں لے لیا گیا، جن میں مقتول کی دوسری اہلیہ کا والد اور اس کے دو بھائی شامل ہیں۔
پولیس کا کہنا ہے کہ مقتول کے والد ظہیر عباس کی مدعیت میں مقدمہ درج کرلیا گیا ہے جبکہ گرفتار ملزمان سے مزید تفتیش جاری ہے تاکہ قتل کی وجوہات اور دیگر پہلوؤں کا مکمل تعین کیا جاسکے۔
