THE PUBLIC POST
کراچی کے علاقے گلستانِ جوہر کے پہلوان گوٹھ میں واقع ایک گھر سے 40 سالہ خاتون کی کئی روز پرانی لاش برآمد ہوئی ہے۔
پولیس کے مطابق اہلِ خانہ کی جانب سے تشویش کے اظہار پر جب قانون نافذ کرنے والے ادارے رشتہ داروں کی موجودگی میں گھر کا دروازہ کھول کر اندر داخل ہوئے تو وہاں سے سندس نامی خاتون کی لاش ملی۔
ابتدائی معلومات کے مطابق متوفیہ گھر میں اکیلی رہتی تھیں اور آن لائن کاروبار سے وابستہ تھیں۔ اہلِ خانہ کے مطابق گزشتہ دو سے تین روز سے ان کا کسی سے کوئی رابطہ نہیں ہو رہا تھا، جس پر شک کی بنیاد پر پولیس کو اطلاع دی گئی۔
لاش کو ضابطے کی کارروائی اور پوسٹ مارٹم کے لیے جناح اسپتال منتقل کردیا گیا ہے۔ پولیس واقعے کی مزید تحقیقات کر رہی ہے تاکہ موت کی وجہ اور دیگر حالات کا تعین کیا جا سکے۔
