THE PUBLIC POST
کراچی میں جوڈیشل مجسٹریٹ ایسٹ نے غیرقانونی کال سینٹر چلانے اور فراڈ کے الزامات میں گرفتار 15 غیرملکیوں سمیت 34 ملزمان کو عدالتی ریمانڈ پر جیل بھیجنے کا حکم دے دیا ہے۔
نیشنل سائبر کرائم انوسٹی گیشن ایجنسی (این سی سی آئی اے) نے تمام ملزمان کو ڈیفنس کے مختلف علاقوں سے گرفتار کرنے کے بعد جوڈیشل مجسٹریٹ ایسٹ کی عدالت میں پیش کیا۔ تفتیشی افسر نے عدالت کو بتایا کہ دو روز قبل ڈیفنس کے علاقے میں چھاپے مار کر ملزمان کو گرفتار کیا گیا، جو ایک غیرقانونی کال سینٹر چلا رہے تھے۔
تفتیش کے مطابق ملزمان کال سینٹر کے ذریعے لوگوں کو مختلف سرمایہ کاری اسکیموں میں سرمایہ لگانے پر آمادہ کرتے اور بعد ازاں ان سے بھاری رقوم وصول کرتے تھے۔ ملزمان کے خلاف پیکا ایکٹ اور فراڈ سے متعلق مقدمات درج کیے گئے ہیں۔
این سی سی آئی اے کے تفتیشی افسر نے عدالت کو آگاہ کیا کہ ملزمان میں 15 غیرملکی بھی شامل ہیں، جس کے باعث سیکیورٹی خدشات لاحق ہو سکتے ہیں، لہٰذا انہیں عدالتی ریمانڈ پر جیل بھیج دیا جائے۔
عدالت نے دلائل سننے کے بعد تمام ملزمان کو 2 جنوری تک عدالتی ریمانڈ پر جیل بھیجنے کا حکم دیتے ہوئے تفتیشی افسر کو آئندہ سماعت پر چالان پیش کرنے کی ہدایت کر دی۔
