THE PUBLIC POST
کراچی: منگھوپیر کے علاقے میں گرم چشمہ کے قریب گزشتہ روز ایک افسوسناک حادثے میں 4 سالہ بچی نور صبا جاں بحق ہو گئی۔ پولیس کے مطابق بچی گھر کے باہر کھیل رہی تھی کہ تیز رفتار ٹرک نے اسے ٹکر مار دی، جس کے نتیجے میں وہ موقع پر ہی جانبر نہ ہو سکی۔
حادثے کے فوراً بعد پولیس موقع پر پہنچ گئی اور ٹرک کے کلینر کو حراست میں لے لیا، جبکہ ٹرک کا ڈرائیور فرار ہونے میں کامیاب ہو گیا۔ پولیس کا کہنا ہے کہ فرار ڈرائیور کی تلاش کے لیے کارروائی جاری ہے اور واقعے کی تحقیقات کی جا رہی ہیں۔
واقعے کے بعد علاقے میں سوگ کی فضا چھا گئی جبکہ اہلِ علاقہ نے ٹریفک کے ناقص انتظامات اور تیز رفتار گاڑیوں کے خلاف سخت تشویش کا اظہار کیا۔ پولیس نے شہریوں کو یقین دلایا ہے کہ ذمہ داران کے خلاف قانونی کارروائی عمل میں لائی جائے گی۔
