THE PUBLIC POST
مریم نواز شریف نے صوبہ پنجاب میں گندم کے کاشتکاروں کے لیے 6 ارب روپے مالیت کے باردانہ کی مفت فراہمی کا اعلان کیا ہے۔
حکومتی پالیسی کے مطابق رجسٹرڈ کاشتکاروں کو سرکاری خریداری مراکز سے فی ایکڑ 10 بوریاں باردانہ فراہم کیا جائے گا، جبکہ کسان کارڈ رکھنے والے کاشتکاروں سے ترجیحی بنیادوں پر گندم کی خریداری کا اصولی فیصلہ بھی کیا گیا ہے۔
اجلاس میں یہ بھی طے پایا کہ 3500 روپے فی من کے حساب سے گندم خریدنے کے بعد 72 گھنٹوں کے اندر کاشتکاروں کو ادائیگی یقینی بنائی جائے گی۔
وزیراعلیٰ مریم نواز شریف نے صوبے میں ”ورک ود پنجاب گورنمنٹ“ پروگرام کے آغاز کا اعلان بھی کیا۔
انہوں نے اپنے بیان میں کہا کہ کاشتکاروں کے مفادات کا ہر صورت تحفظ کیا جائے گا اور زرعی شعبے کو پائیدار بنیادوں پر ترقی دی جا رہی ہے، جبکہ آئندہ دو برسوں میں حقیقی زرعی انقلاب لانے کے عزم کا اعادہ بھی کیا۔
