THE PUBLIC POST
قومی کرکٹ ٹیم کے سابق کپتان شاہد آفریدی کا کہنا ہے کہ خود کو ثابت کرنے کے لیے گرین شرٹس کو بڑی ٹیمز کے خلاف اچھی کارکردگی دکھانے کی ضرورت ہے۔
شاہد آفریدی نے نجی ٹی وی کے شو میں بطور مہمان شرکت کی جہاں اُنہوں نے پاکستان اور بھارت کے درمیان جاری سیاسی کشیدگی کے دونوں ممالک کے درمیان کرکٹ میچز پر پڑنے والے اثرات کے بارے میں بات کی۔
اُنہوں نے موجودہ صورتحال کا ذمہ دار بھارتی وزیرِاعظم نریندر مودی کو قرار دیا۔
سابق کرکٹر نے کہا کہ نریندر مودی اور گودی میڈیا نے پاکستان اور بھارت کے درمیان تعلقات کو مزید کشیدہ کرنے میں بڑا کردار ادا کیا ہے۔
واضح رہے کہ پاکستان نے امارات کو 41 رنز سے شکست دے کر ٹورنامنٹ کے اگلے راؤنڈ کے لیے کوالیفائی کر لیا ہے۔
اب پاکستان اتوار کو ایشیا کپ کے سپر 4 مرحلے میں روایتی حریف بھارت سے دوبارہ ٹکرائے گا۔
یاد رہے کہ اس سے پہلے ایشیا کپ میں پاکستان اور بھارت کے درمیان ہونے والے میچ کے بعد کھلاڑیوں میں مصافحہ نہ ہونے اور کھیل میں سیاست کو گھسیٹنے پر تنازع شدت اختیار کر گیا ہے۔
