THE PUBLIC POST
تدفین کے انتظامات سے وابستہ 48 سالہ فیونرل ڈائریکٹر رابرٹ بش نے اعتراف کیا ہے کہ اس نے 30 میتوں کی تدفین نہیں کی اور لواحقین کی جانب سے خیراتی مقاصد کے لیے دی گئی رقم خردبرد کی۔ عدالت کی جانب سے اسے 27 جولائی کو سزا سنائے جانے کا امکان ہے۔
پولیس نے مارچ 2024 میں ہل میں قائم لیگیسی انڈیپینڈنٹ فیونرل ڈائریکٹرز کے خلاف اُس وقت تحقیقات کا آغاز کیا جب مرحومین کے لواحقین کی جانب سے سنگین خدشات کا اظہار کیا گیا۔
رابرٹ بش اس سے قبل بھی اعتراف کر چکا ہے کہ اس نے خاندانوں کو دھوکہ دیتے ہوئے اجنبی افراد کی راکھ فراہم کی اور جعلی فیونرل پلان فروخت کیے۔
سماعت کے دوران جج جسٹس مسٹر ہلیارڈ نے ریمارکس دیے کہ اس نوعیت کے مقدمے میں قید کی سزا ناگزیر ہے، تاہم ملزم کو ضمانت پر رہا کر دیا گیا۔ رابرٹ بش کے خلاف فرد جرم اُس وقت عائد کی گئی جب تلاشی کے دوران انسانی باقیات برآمد ہوئیں، جن میں چار ایسے بچے بھی شامل تھے جو دورانِ حمل ضائع ہو گئے تھے۔
ہمبر سائیڈ پولیس کے مطابق الزامات مئی 2012 سے 6 مارچ 2024 کے درمیان کے عرصے سے متعلق ہیں، جبکہ عدالت میں کلرک کی جانب سے تقریباً 10 منٹ تک الزامات پڑھ کر سنائے گئے۔
رابرٹ بش نے تمام الزامات پر بغیر کسی جذباتی ردِعمل کے جرم کا اعتراف کیا، جبکہ عدالت میں موجود لواحقین نے اس کے رویے پر شدید ردعمل دیتے ہوئے اسے “حقیقی درندہ” قرار دیا۔
لواحقین کا کہنا تھا کہ جرم قبول کرنے کے باوجود ملزم کو عدالت سے آزاد جاتا دیکھنا افسوسناک ہے اور اسے فوری طور پر حراست میں لیا جانا چاہیے تھا۔
