’’تنخواہوں میں اضافہ، توانائی کی قیمتوں میں کمی‘‘، بڑی خوشخبری سنا دی گئی

اسلام آباد: وزیراعظم کے معاون خصوصی ہارون اختر نے تنخواہوں میں اضافے اور توانائی کی قیمتوں میں کمی سے متعلق خوشخبری سنا دی۔

ذرائع کے مطابق وزیراعظم کے معاون خصوصی صنعت وپیداوار ہارون اختر نے اسلام آباد میں پریس کانفرنس کرتے ہوئے کہا کہ بجلی کی قیمتوں میں کمی سے پیداواری شعبے میں مثبت اثرات مرتب ہوئے اور پاکستان اپنی تاریخ کی پہلی مائیکرو اکنامک نمائش کرنے جا رہا ہے۔

معاون خصوصی نے بتایا کہ اس مائیکرو اکنامک نمائش کا انعقاد لاہور ایکسپو سینٹر میں 24 سے 26 جنوری تک کیا جا رہا ہے۔

ان کا کہنا تھا کہ حکومت کی پیداواری شعبے کی ترقی اور مائیکرو اسمال اینڈ میڈیم انٹر پرائز پر خصوصی توجہ مرکوز ہے۔ یہ پاکستان کی سب سے بڑی مائیکرو اسمال اینڈ میڈیم انٹرپرائز ایکسپو ہوگی۔

ہارون اختر کا کہنا تھا کہ ہمیں معیشت کیلیے سخت فیصلے کرنا پڑے، لیکن ان سخت فیصلوں کے آج مثبت نتائج برآمد ہو رہے ہیں۔ اسٹاک مارکیٹ کی اونچی اڑان سے ثابت ہو رہا ہے کہ معیشت بہتر ہے۔ ہمارا پالیسی ریٹ بہت کم ہو رہا ہے۔

معاون خصوصی نے بتایا کہ وزیراعظم کے وژن کے مطابق انڈسٹریل پالیسی بنالی ہے، جلد اعلان کیا جائے گا۔ توانائی کی قیمتوں میں بھی کمی ہو گی۔ عوام کی تنخواہیں بڑھیں گی، جس سے ان کی پرچیزنگ پاور بھی بہتر ہوگی۔

انہوں نے یہ بھی کہا کہ آئندہ چار سال میں پاکستان کے تمام شعبوں میں ٹیرف پندرہ فیصد ہو جائے گا۔ ملک میں کوئی اضافی ریگولیٹری اور کسٹم ڈیوٹیز نہیں ہوں گی۔